Wat my deur die jaar dra, is in die eerste plek my geloof, my doelgerigtheid en my diep wete dat elke seisoen van die lewe ’n mens iets kom leer. Ek glo dat daar in elke hoogtepunt én elke uitdaging ’n les opgesluit lê. Iets wat jou vorm, jou sterker maak en jou voorberei vir dit wat nog voorlê. Dit is juis daardie wete wat my aan die gang hou: dat niks verniet is nie, en dat elke ervaring deel is van ’n groter doel.

Ek word ook deur die jaar gedra deur die passie om ’n verskil te maak in ander se lewens. Of dit nou is deur ’n woord van bemoediging, deur my eie storie te deel, of deur net eg en opreg teenoor ander te wees. Ek glo dat ons almal die vermoë het om lig te bring waar daar dalk onsekerheid, seer of twyfel is. Vir my gaan dit nie net daaroor om self te groei nie, maar ook om ander saam met my op te lig en te herinner aan hul waarde, hul potensiaal en hul krag.

Daar is tye in ’n jaar wat mens moeg raak, onseker voel of wonder of jy sterk genoeg is vir alles wat van jou gevra word. Maar juis in daardie oomblikke leer ek om vas te hou aan hoop, dankbaarheid en selfrefleksie. Ek herinner myself dan daaraan dat groei nie altyd gemaklik is nie, maar altyd nodig is. Een van die grootste waarhede waarvolgens ek leef, is: “If you don’t change it, you are choosing it.” Daardie woorde herinner my dat ons nie altyd beheer het oor alles wat met ons gebeur nie, maar dat ons wel verantwoordelikheid kan neem vir wat ons toelaat, wat ons dra en wat ons besluit om te verander.

Wat ek graag wil oordra, is dat elke vrou waardevol is, dat elke persoon ’n doel het, en dat ware krag nie altyd in groot oomblikke lê nie, maar dikwels in die stille besluit om nie op te gee nie. Ek wil hoop oordra aan die vrou wat dalk twyfel in haarself, moed aan die een wat deur ’n moeilike seisoen gaan, en inspirasie aan die een wat weet daar is meer vir haar, maar nog die moed bymekaarmaak om dit te gryp.

Ek wil ook oordra dat egtheid belangrik is. In ’n wêreld waar mense dikwels voel hulle moet voorgee, perfek wees of aan almal se verwagtinge voldoen, wil ek ’n herinnering wees dat daar soveel krag lê in net jouself wees. Jou storie, jou stem, jou pad en selfs jou seerkry het waarde. Dit is dikwels juis deur ons uitdagings dat ons die mooiste dele van onsself ontdek.

As ek iets in hierdie jaar en in elke platform wat ek ontvang wil nalaat, is dit die boodskap dat groei moontlik is, verandering moontlik is, en dat jy nie vas hoef te bly in ’n plek wat nie meer goed is vir jou nie. Jy het die vermoë om op te staan, te kies, te groei en met oortuiging vorentoe te beweeg. Ek wil hê mense moet wegstap met die wete dat hulle genoeg is, dat hulle dieper as hul omstandighede is, en dat daar altyd hoop is vir ’n nuwe begin.